टानमा सवल र युवा समूहको नेतृत्व आउँछ

0

ट्रेकिङ एजेन्सिज एसोसिएसन अफ नेपाल (टान)को निर्वाचन नजिकिएसँगै कांग्रेसनिकट नेपाल पर्यटन व्यवसायी संघ (निट) अर्थात लोकतान्त्रिक समूहबाट खुमबहादुर सुवेदीले अध्यक्षको उम्मेदारी घोषणा गर्नु भएको छ । ०४९ सालमा टेकिङ गाइड हुँदै पर्वतीय पर्यटनमा प्रवेश गरेका सुवेदी अब्बल पर्यटन व्यवसायीको रुपमा परिचित हुनुहुन्छ । युनिक एडभेन्चर इन्टरनेसनल प्रालि, ट्रिपल ए होलिडोज र ट्रिपल ए ट्रान्सपोर्टका कम्पनी प्रबन्धक निर्देशक सुवेदीले नियात्राकारसमेत हुनुहुनुहुन्छ । उहाँले ‘पदयात्राका पाइलाहरु’ र ‘बेल्जियमका क्षणहरु’ नामक दुईवटा कृति बजारमा ल्याइसक्नु भएको छ । पर्यटन व्यावसायको प्रबद्र्धन, प्रचारप्रसार र अनुभव तथा अनुगमनका हिसाबले उहाँले ४० भन्दा बढी देशको भ्रमण गरिसक्नु भएको छ । चुनावी एजेन्डा र टानको भावी भविष्य कस्तो हुन्छ ? भन्ने विषयमा आधारित भई तामाकोशी सन्देश साप्ताहिकका संवाददाता एलबी विश्वकर्माले टानका पूर्वउपाध्यक्ष एवं प्रजातान्त्रिक समूहबाट अध्यक्ष पदका प्रत्यासी खुमबहादुर सुवेदीसँग गरेको कुराकानीको सम्पादित अंशः

खुमबहादुर सुवेदी
अध्यक्षका उम्मेदवार
लोकतान्त्रिक समूह

टानको अध्यक्षमा तपाईकोउम्मेदवारी किन ?

पहिलो कुरा म पर्यटन व्यावसायी हुँ । यसैगरि म टानको नेतृत्व गर्न सक्छु । टानमा आबद्ध व्यावसायीका समस्या व्यावसायिक वस्तु स्थितिबारे जानकार छु । उहाँहरुको हकहितका लागि मैले काम गर्न सक्छु । पछिल्लो समय ट्रेकिङ कम्पनी र व्यावसायीहरुमा छाडातन्त्र मौलाएको छ । अधिकांश ट्रेकिङ कम्पनीहरु राम्र्रा छन् । तर, त्यहाँभित्रका केही कम्पनीका कारण अहिले सिंगो टानको बेइज्जत भइरहेको छ । सरकारले तिनै कम्पनीका गल्तीहरुलाई देखाउँदै हामीमाथि औँला उठाइरहेको छ । मैले यी समस्यालाई व्यावसायीदेखि लिएर उच्च तहसँग लबिङ गरेर हटाउने योजना बनाएको छु । टानका सदस्य व्यावसायीहरुलाई व्यवस्थापन तथा बजारीकरण गर्नेछु । करको मारबाट व्यावसायमा असर नपरोस् भनेर तीनवटै सरकारलाई कर एकीकरण गर्न पर्यटन विभागको तर्फबाट आह्वान गर्नेछु । सबैखाले करहरुलाई एकद्वार गर्न पहल गर्ने छु । आरोहण र पदयात्रामा जाने कामदारको सामूहिक बिमाको व्यवस्थापन गर्नेछु । मेरो सबैभन्दा पहिलो र ठूलो काम नेपालमै एडभेन्चर ट्राभल मार्ट आयोजना गर्ने हो । विदेशमा मात्र आयोजना हुने ट्राभलमार्ट हालसम्म पनि नेपालमा सञ्चालनमा ल्याउन सकिएको छैन । नेपाली पर्यटन व्यावसायीहहरुले उतै गएर भाग लिन बाध्य छन् । नेपालमा ट्रेकिङमा जाने अधिकांश पर्यटक विदेशी हुन् । उनीहरु धेरैजसो विदेशी ट्रेकिङ कम्पनीको प्याकेजमा आउने र नेपाल आइसकेपछि पनि आफैँ पदयात्रामा जाने गरेका छन् । यसले पदयात्रा व्यावसायमा जोडिएका व्यावसायी धरासायी हुने स्थिति सिर्जना भएको छ । साथै सरकारको राजस्व पनि गुमिरहेको छ । यस्तै कारणले विभिन्न समयमा भएका दुर्घटनाले नेपालको पदमार्ग सम्बन्धमा गलत तथ्य टिप्पणी हुने गरेको छ । यसलाई चिर्न ‘नो ट्रेकिङ विथाउट गाइड एन्ड पोर्टर’ लाई कार्यान्वायनमा ल्याउने छु । पर्यटक सुरक्षाका दृष्टिले पनि राम्रो छ भन्ने पर्यटकहरुलाई जानकारी गराउने छु । ट्रेकिङ परमिट लागू गरी त्यसमार्फत पर्यटकको सुरक्षा, राजस्व र नियमन गर्न सकिन्छ । हामीले तिर्नुपर्ने कर एउटै रकमलाई दोहोरो आम्दानीका रुपमा बुझेर भ्याट थोपरिएको छ । हामीले ट्रेकिङ प्याकेज पर्यटकको प्रतिस्पर्धाका आधारमा बेचिरहेका छौँ । यस विषयमा सरकार जानकार छ । तर, विभिन्न बाहनामा दोहोरो कर उठाइरहेको छ । यस विषयमा धेरैपटक बहस भयो । भ्याटलाई लिएर ०५१÷५२ देखि ०७१÷७२ सम्म यस्तो स्थिति थिएन् । सहज थियो । ०७२ पछि यस्तो स्थिति सिर्जना भयो । अहिले व्यावसायीलाई नै धरासायी बनाउने हिसाबले तीनवटै सरकारले करको दायरा वृद्धि गर्ने दाउमा हामीमाथि आर्थिक बोझ लादिरहेका छन् । यही कारणले व्यावसायीहरु बाध्य भएर प्याकेज महँगो बनाउँदै गएका छन् ।
एकद्वार भन्नुभयो, कुन–कुन क्षेत्रलाई एकद्वार गर्न आवश्यक छ ?
करको दायरा एकद्वार गर्न आवश्यक छँदै छ । विगतदेखि नै एक ठूलो समस्याको रुपमा रहेको रुट पर्मिटको समस्या छ । यसलाई मैले नियमन गराउने प्रतिबद्धता गरेको छु । अहिले पुरातत्व बिभाग, पर्यटन विभागलगायत धेरै ठाँउबाट परमिट लिने र दिने गरिँदै आएको छ । यसलाई अब एकै स्थानबाट गर्ने व्यवस्था मिलाउने गरी कानुनमै व्यवस्था गर्न वा व्यावसायीले नै कानुनसम्मत ट्रेकिङ बेच्ने वा त्यसको निरीक्षण गर्ने व्यवस्था गर्न व्यावसायी र सरकारसँग लबिङ गर्नेछु । यसले अवैधानिक व्यावसायी तथा गाइड, पोर्टरहरु स्वतः समाप्त भएर ट्रेकिङ व्यावसायलाइ एकत्रित गर्ने छ । अहिले धेरै स्थानमा गाइडबिनै पर्यटकहरु घुम्न पाउने व्यवस्था छ । अब ३ हजार मिटरभन्दा अग्ला हिमालमा जाँदा अनिवार्य गाइडको व्यवस्था गर्नुपर्ने व्यवस्था गरिने छ । यसले व्यावसायीहरुको आम्दानी र सुरक्षा हिसाबले पनि राम्रो हुनेछ । धेरै कानुनहरु हामीलाई अलमल पार्ने खालका छन् । यसलाई कानुन बनाएर निर्देशिका जारी गर्न सम्बन्धित मन्त्रालयसँग माग राख्ने र जारी गर्न दबाब सिर्जना गरिने छ । विश्वस्तरमा पर्यटकीय क्षेत्रहरुको प्रचारप्रसारका लागि सिएनएन, बिबिसी, नेपाली पत्रपत्रिका, रेडियो टेलिभिजन, सामाजिक सञ्जाल फेसबुक, ट्वीटर, इन्स्टाग्राम र याहुको अत्याधिक प्रयोग गरेर पर्यटकीय गन्तव्यका बारेमा जानकारी दिन सकिने छ । उपल्लो मुस्ताङ, डोल्पालगायत क्षेत्रमा ट्रेकिङमा कडाइ गरिएको छ, २ जना अनिवार्य हुनुपर्ने व्यवस्था हटाएर एक्लै पनि जान सकिने स्थिति निर्माण गर्न पहल गर्नेछु । टान र पर्यटन बोर्डको आन्तरिक झगडाका कारण बेरुजु रकम देखाएर टानलाई दुःख दिने काम भएको छ, यसलाई बेरुजुका नाममा देखाइएका अवरोधहरुलाई केलाएर २ महनाभित्रै समाधान गर्नेछु ।

Leave a Reply